2 - فى الغربه

وجع فى قلبك وانت مسافر ، أكلان يدعوك للهرش فى نفساويتك و متعرفش تهرشه إحساس غريب و انت فى الطياره انها هتقع بيك و بركابها علشان تترحم يترحموا من اللى رايحين يشوفوه فى الغربه . مش لازم الغربه تبقى بهدله علشان نقول الغربه صعبه ، فيه ناس كتير جداً بتعيش كويس فى الغربه ، دخل كويس و شقه أو فيلا و عربيه محترمه و شغاله و بيشربوا بيبسى كل يوم يعنى مش نفسهم فى حاجه ، بس مش هى دى النقطه . الغربه صعبه !!!!!!! مش أحسن من وقف الحال اللى فى مصر ؟؟؟ لأ مش أحسن قوى يا صاحبى مش أحسن ازاى يعنى ؟؟؟ هناك النفر بياخد قد كده على قلبه أول الشهر و عايش فى تكييف و عربيه و مكتب نضيف و حاجه حلوه، وهنا متبهدل ومش هينفع يحوش 2 جنيه فى الشهر حتى . طيب و الحاله النفساويه يا صاحبى ؟؟؟ لما تسيب أمك و اخواتك و اصحابك و حبايبك ؟؟ لما تسيب مكانك و سريرك ، عارف اللى بيحصل إيه ؟؟؟ فى لحظه اخواتك بيبصوا على سريرك و يبكوا من جواهم و يقولوا فلان كان زمانه نايم هنا دلوقتى ، و هما بيتفرجوا على فيلم يقولوا فلان كان بيحب الفيلم ده ، كااااااااااااااااااااااان ، كان يا صحبى و كأنك مت ، الأسوأ من كده و السفره بتتحضر طبقك بيتحط بالغلط لمدة شهر أو شهرين ، و كوباية الشاى بتتعملك معاهم على أساس انك موجود ، ولما يكتشفوا الغلطه عيونهم تدمع و كأنك مت يا صاحبى. ما بالك بيك انت بقى مرمى هناك زى الكلب مش لاقى أهلك و اصحابك وحبايبك و البديل اللى بتلاقيه شوية ورق اسمهم فلوس ، أهلك و حبايبك وأصحابك يتبدلوا بشوية ورق ، يلعن أبو دول شوية ورق و يلعن أبو الفلوس و لو حبيتها يا صاحبى يبقى يلعن أبوك انت كمان ، بتتحول فى وقت من الأوقات لشخص كريه وعفن لأن هيحصلك حاجه من الاتنين : الأولى : انك هتبقى عبد للورق اللى اسمه الفلوس ودى أسوأ حاجه ممكن تحصل لحد . التانيه : ان يكون جواك حقد دفين على اللى متغربش و قاعد وسط حبايبه و على أرضه و فى بلده . فى كلا الحالتين يا صاحبى بتبقى اتغيرت و اتغيرت نفساويتك و بعد فتره ومن غير ما تحس تبقى شخص كريه وعفن و تكره نفسك و حساباتك كلها تبقى غلط ، تيجى تراجع قايمة أصدقائك تضيف ناس بالغلط و تحذف ناس ، تيجى ترتب أولوياتك تضيف حاجات ملهاش لازمه أصلاً و تشيل حاجات و ترتب فى النهايه بالمقلوب زى الحمار . مش مهم مرتاح فى شغلك أو ناجح أو لأ ، المهم بتقبض آخر الشهر ، يعنى محلك سر ، و القليل من الناس بتعرف و تلحق تطور نفسها و ياويله اللى مبيلحقش ، بيتفرم لما يرجع ده لو رجع . بترجع يا صاحبى عندك أمراض الغربه اللى قلنا عليها دى : كريه و عفن و عبد للقرش أو حقود ، و المصيبه التانيه اللى بترجع بيها بتبقى حاله مرضيه جسديه : فشل كلوى ، أو كبدى أو أوانص حتى ، نظرك ضعف و كرشك كبر و ساعات ناس بترجع سمعها تقيل كمان و بترجع حمار مش فاهم البلد ماشيه ازاى بتحس ان كل حاجه مقلوبه و فى البدايه بتعمل أبو العريف و تقول يعععععع الناس دى عايشه ازاى ده أنا لما كنت فى بلاد الواق الواق كانت كل حاجه مظبوطه و كله تمام و البلد كويسه ، بس لو كنت مصدق كده يا صاحبى يبقى ... عليك و على بلاد الواق الواق اللى كنت فيها و ياريت ترجعلها ومنشوفش خلقة أهلك هنا تانى . يعنى مسافرش و للا إيه ؟؟ انت عقدتنى !!! الغربه صعبه ، بس مش بقول محدش يسافر ، كل واحد و ظروفه ، وكل واحد وطريقته فى الحياه ، بس خلى بالك يا صاحبى لأن الغربه صعبه