أبو العـــُــريف

أعرفكم بنفسى .. خدامكم و سيدكم و تاج راسكم أبو العُريف بضم العين زى ما انتم شايفين كده .. متستغربوش الإسم و إلا هضطر استغرب أساميكم كلكم انتم و اللى خلفوكم .. أبو العريف ده مش اسمى الحقيقى ... ده لقب فخرى اكتسبته بمجهودى الخاص بسبب تعبيرى عن آرائى فى مختلف القضايا المحلية منها و العالمية بمنتهى الصراحة فى جميع المحافل الدوليه ... على كل قهوه قعدت عليها و فى كل مسجد دخلته و فى المترو و الأتوبيس و القطر و حتى على السلالم مع الجيران وعند الحلاق و عند عم احمد البقال كمان . ولعلكم تتساءلون ... أية قضايا تلك التى أدلى يها بدلوى الممتلئ عن آخره بالحكم و المعانى و الأفكار و التحليلات المفتكسة و التى أعصر مخى حتى أصل إليها .. و التى لا تأتى من فراغ ... فأنا أفكر و أفكر و أعمل عقلى فيما يلزم وما لايلزم من شئون الحياة حتى أكون وجهة النظر التى سرعان ما استفرغها أمام أى أحد بلا خوف و لا وازع ولا ضمير ... ففى نظرى إذا تكلمنا عن الآراء فلا وجود للضمير . فالضمير قد اختفى من حياتنا بعد عام 1954 لما الثورة اللى هى فى الأصل انقلاب اتقلبت على زعيمها محمد نجيب و حددوا اقامته و بعدين عبد الناصر عمل الفيلم بتاع المنشيه ده و لبسه للإخوان المسلمين علشان هى أساساً جماعه مش كويسه و بيقولك انهم مش مسلمين زينا ... دول ليهم اتجاه تانى كده من أيام أبوهم الروحى سيد أبو قطب ما وقف فى ظلال القرآن ... و أنا بصراحه سمعت الشيخ اسمه ايه ده فى قناة البتاعه بيقول انهم مش كويسين علشان مش عارف إيه كده بخصوص خلق القرآن و حاجات كده المهم مش كويسين يعنى .. فعبد الناصر بعد لما كان صاحبهم اتقلب عليهم زى ما اتقلب على نجيب وبعدين عمل السد بقى علشان الناس تحبه بس ودى البلد فى داهيه لما حارب اليمن قصدى حارب فى اليمن و بعدين اتضرب فى 67 .. و بعدين اتقلب عليه عبد الحكيم و دخلوا فى دور طحن مع بعض و عبد الناصر قتله و بعدين السادات سمم عبد الناصر وخد مكانه لما مات و جه السادات و عمل فيلم مشترك مع امريكا و قال ايه انه كسب اسرائيل فى الحرب فى 73 وده كان فيلم طبعاً و بعدين وقع معاهم اتفاقية السلام دى وباع لهم البلد و قبض على المسقفين و سقف على قفاهم فى المعتقل و طبعاً كلنا عارفين مات ازاى الله يرحمه بقى ودانا فى داهيه ... و بعدين جه مبارك بقى و عمل شوية شغل فى الأول .. أسفلت و تليفونات و مساكن و 13 أو 14 مستشفى كده .. وبعدين قلب هو كمان .. بس قلب على الشعب مش على الثوره .. المهم .... كنا بنقول ايه ؟؟؟؟ آه كنا بنتكلم عن الضمير ... الضمير ده كان زمان .. افتكر ان جدى كان بيقول ان التجار اليهود فى مصر كان عندهم ضمير و كانوا كويسين قوى و محترمين بس لما الثوره بتاعة الظباط دى جت و طردت الملك طفشتهم و اضطروا يروحوا فلسطين و البرازيل .. ومن هنا كان الاحتلال الاسرائيلى لفلسطين .. و بعدين الفلسطينين كانوا بيبيعوا أراضيهم للإسرائيليين علشان بيدوهم قرشين حلوين ، ولما استقر الاسرائليين فى فلسطين الناس بتوع الثوره دول فاقوا لنفسهم و قالوا يا لهوى ايه اللى احنا عملناه ده ، و قعدوا يجروا شكل اسرائيل لغاية لما ضربتهم و فضحتهم خالص و انتم عارفين الباقى .. وبعدين بقى اسرائيل اضطرت تعمل السلاح النووى و لللا الذرى ده علشان لو حد ضربها تبقى تدافع عن نفسها ... لأ جدى مش اسرائيلى و لا يهودى متقولش كده عيب ، هو اللى بيقول الحقيقه يبقى اسرائيلى ؟؟ ... فمصر بقى قالتلك لما نعمل نووى احنا كمان ... فجت الوكاله و فتشت وملقتش حاجه و مصر كانت غيرت فكرها أساساً و قالتلك مش هنعمل .. لأ مش وكالة البلح .. وكالة التائه الذريه ... أيون .. اللى هى بتاعة البرادعى ... صحيح بالمناسبه البرادعى ده أنا موافق انه يبقى رئيس جمهوريه ... ليه بقى ؟؟؟ لانه اشتغل بره وعارف الدنيا ماشيه ازاى و على ما اسمع كده انه يعرف الرؤساء الاجانب دول نفر نفر .. شخصياً و اصحابه كمان ... وعلى كده بقى هيعرف يظبطنا و يمكن يلغى التأشيره و نعرف ناخد تأشيرة الشنجن من غير وجع دماغ و تبشبش و تبقى فل ... و يحطلنا قاعده امريكيه زى اللى فى قطر كده تحمينا لو اسرائيل فكرت تهاجمنا... يعنى ايه ؟؟ ... لأ أمريكا هتحمينا من اسرائيل ياعم انت وهو ... دى بتاعة حقوق الإنسان ... كنا بنقول ايه ؟؟؟ ...... آه الضمير و أمريكا دى بلد أصلاً أصلاً عندها ضمير و علشان كده اسمه ايه الاسود ده .... أباما خد جايزة أوبل للسلام حتى من قبل ما يغير الكرافته التى حلف يمين الطلاق بيها لما كان بيمسك امريكا ... و الدليل ان امريكا عندهم ضمير ان الانتخابات متزورتش و جه واحد نجرو يعنى اسود و بقى الرئيس بتاعهم ... جايزة أوبل دى هى ذات نفسها اللى خدها البرادعى اللى عايزينه يبقى رئيس الجمهوريه عندنا و يارب نفهم ... و برضه خدها عم نجيب محفوظ بس فى الأدب يعنى هو كان أكتر حد مؤدب فى العالم أيامها ... و بعدين خدها عم أحمد زويل اللى اكتشف الفيمتو اللى بنعمله شربات ده ... بس الفيمتو مبقاش حلو زى الأول لأنهم بقوا بيغشوه علشان مبقاش عندهم .... ضمير ... صح كنا بنتكلم عن الضمير .. تصدقوا زهقت ؟؟؟ ........ كفايه كده النهارده .