بـيــــــــســـــــــــــــو

بعد صلاة العيد
الناس دفعت السته جنيه وصلت واتبسطت .. وكله رايح يشوف هيعيد على مين .. اللى رايح يفطر مع أمه .. واللى رايح يفطر مع قرايبه .. واللى رايح يزور المقابر علشان يعكنن على نفسه أول يوم العيد .. واللى منامش من امبارح وهينام شويه وبعدين ينزل يتفاعل اجتماعياً ..
لكن الأطفال لهم دماغ تانيه خالص .. لبس العيد .. الصواريخ والمفرقعات والألعاب الناريه دى حاجات أساسيه بالنسبه لهم .. ولا يمكن ولا يجوز التنازل عنها بأى حال من الأحوال .. ولا بالتفاوض .. ولا بالتوافق ولا بالعنف حتى .. اخبط راسك فى الحيط ..
بعد صلاة العيد بلحظات .. بدأت الناس تنتشر فى الشوارع .. الغالبيه بتصلى فى ساحات أو مساجد قريبه من بيوتها .. وعلشان كده فى الأغلب الأعم هتلاقى الناس ماشيه على رجليها .. وعارفين بعض .. كل سنه وانت طيب يا باشا .. وانت بصحه وسلامه سعادتك .. غالباً الألقاب علشان هما عارفين بعض شكلاً بس .. مش عارفين أسماء بعض
بعد صلاة العيد بشويه .. مجموعه من البشر متحلقين حول أحد الأشخاص يقف بجوار سياره فارهه يتحدثون معه ويلتقطون معه صوراً تذكاريه .. لا يستطيع أحد المارة من بعيد تبين هذا الشخص بسبب الازدحام حوله .. انتهى التصوير وركب سيارته وانطلق فى سرعه مبتسماً
أحد الأطفال يلقى بنفسه تقريباً أمام السياره .. كاد ذلك الشخص أن يصدمه .. تفاداه بصعوبه بالغه وسقط الطفل أرضاً دون أن يمسسه سوء .. وسمع الجميع تلك الكلمة اللى خرجت من فم قائد السيارة الفارهه .. فتح قبل ما تعدى يا عبيط .. ابتسم الجميع .. واستمر ذلك الشخص فى طريقه
بعد صلاة العيد بدقائق .. ابتسم الجميع .. عدا ذلك الطفل .. ظل متجهماً .. لاحظ أحدهم أن ملابس الطفل رثه .. متسخه .. اقترب منه ليعرف من هو .. ولماذا تعمد أن يلقى بنفسه أمام تلك السياره .. لم يكن من المتوقع أن يبدأ الطفل فى القيام والاقتراب من أحد الأجولة وحملها على كتفه ..
إنه جوال " بيسو " .. لا .. ليس اسمه الحقيقى .. اسمه الحقيقى " محمود " .. لكن محدش بيقولى يا محمود غير أبله " فلانه " .. مديرة الملجأ اللى لما الدنيا بتقفل فى وشى بروحه ... هكذا قال بيسو أو محمود .. الشوال ده اللى بلم فيه البلاستيك واسلمه لــ " على " .. بيدينى عشرين جنيه فى اليوم .. بجيب بيهم سجاير وأكل .. لأ بنام ورا قسم " كذا " فى عربيه عامله حادثه .. العساكر عارفينى ومبيخلوش حد ييجى جنبى .. الظابط كمان عارفنى وبيديلى فلوس ومره ادالى فانلتين وجاكت بتوع ابنه .. رجعونى الملجأ بالعافيه 3 مرات .. مبحبش الملجأ .. فى ناس فى الملجأ بيعملوا حاجات وسخه معايا .. وأنا مش عايز .. لما اشتكيتهم محدش صدقنى .. ولا أبله " فلانه " ... أصلهم بيدوها فلوس .. هما ناس زينا كده قاعدين فى الملجأ برضه .. بس بيخرجوا يبيعوا حشيش ويرجعوا .. آه .. أبله " فلانه " عارفه انهم بيبيعوا حشيش .. مقدرش أقول للظابط ولا للعساكر .. الناس دول يقتلونى
لأ .. أنا مرميتش نفسى قدام العربيه .. كنت عاوز اسلم على الكابتن .. كابتن " فلان " اللى بيلعب كوره .. وكنت عاوز اقوله انى نفسى اتفرج عليه فى الماتش اللى فى الاستاد .. بس شتمنى ومشى
بعد صلاة العيد بساعه ..
اللى روح ينام روح .. واللى راح يفطر مع قرايبه راح .. واللى بيفرقع صواريخه بيفرقع .. واللى بيقرا الفاتحه فى المقابر بيقرا
بعد صلاة العيد بساعه
بيسو بهدومه الوسخه المقطعه .. لسه بيلم قزايز البلاستيك الفاضيه فى الشوال .. علشان آخر اليوم ياخد العشرين جنيه .. ويجيب سجاير وأكل .. وينام فى العربيه اللى عامله حادثه ومحجوزه ورا القسم
واحنا عايزين نروح الجنه
كل عام وانتم بخير

1300 جنيه

مصروف بيتها 30 جنيه فى اليوم .. وهى ست شاطره ومدبره
بتظبط الدنيا بيهم وتلطش فيها ومعاها وساعات كانت بتوفر فلوس تحوشها علشان كل أسبوع تروح تشترى 2 كيلو حلويات فراخ أو سقط لحمه تعمل عليهم شوية شوربه وخضار علشان تبر العيال على حد تعبيرها .
طبعاً سعادتك متعرفش يعنى إيه حلويات فراخ وسقط لحمه .. هقولك بعدين.
من كام شهر الدنيا غليت وزنقت .. بقت بتشترى كيلو واحد بس
الكشرى اللى انت بتاكله كأكلة فقراء كان حلم بالنسبه لعيالها الأربعه ولو مش فاهم احسبها
الشهر اللى فاتت نزلت تشترى حلويات فراخ لقيت السعر زاد تانى ... مشيت وعملت الأكل أورديحى زى باقى الأيام .. والأيام كلها شبه بعض

الست دى دخلها 1300 جنيه فى الشهر ومش شحاته ومش عايزه من خلقتك حاجه
صعبت عليك ؟؟
طيب خد دى بقى
فيه ناس معندهاش دخل من 2011 أساساً
فكرت فيهم ؟
صعبوا عليك ؟
عملت حسابهم معاك فى مشتريات رمضان ؟
معتقدش
تعرف ان فيه ناس فى صعيد مصر بياكلوا فيران الجبل ؟
أكيد متعرفش
لما ييجى اليوم اللى تدى فيه كلاكس لواحد بيعدى الشارع فيسبلك ميتين أهلك ... متفكرش هو شتمك ليه
ولو نزلك من قفاك من العربيه وبوظلك وشك بأى حاجه يلاقيها قدامه ... متستغربش هو عمل كده ليه
وتوضيحاً لسعادتك حلويات الفراخ يعنى الأجنحه و الرجلين
وسقط اللحمه يعنى العضم

إسمى عيد

الصوره بعدسة البت أم ضحكه حلوه : هبه نبيه

يعنى بخفة دمك مبتشوفش ؟؟ ما قلنا اسمى عيد ... أيوه عيد وعلى فكره مش أنا اللى سميت نفسى عيد .. أنا صحيت لقيتنى اسمى كده ... وقبل ما تتريق على إسمى أو على ودانى بص لنفسك فى المرايه الأول يا خفيف الدم .... لو مش عاجبك متكملش قرايه ... إسمى عيد ... بصحى الصبح الساعه 7 ... مبفطرش علشان أوفر أكل ياكله حد من اخواتى .... ببقى قدام الورشه الساعه 8 الصبح .... لأ يا خفه .. صبى عفشجى مش صبى ميكانيكى .. مش شايف المفاتيح اللى فى الصوره ورايا ؟؟ ... الصوره .. آه ... اللى صورنى الصوره دى حتة بت زى العسل .. هحكيلك اليوم ده ... شوف يا سيدى وما سيدك إلا أنا ... اليوم ده رحت الورشه الصبح .. لقيت لمه وناس قدام الورشه معاهم كاميرات و حاجات متركب فيها لمبات ... فيهم ناس شكلهم عاديين كده زينا وناس شكلها غريب قوى ... أول حاجه خدت بالى منها الواد اللى مطول شعره ولابس طوق فى دماغه .. بس لما دققت فيه لقيته أستك مش طوق ... لما الاسطى جه الورشه قالى انهم بيصورا حاجه عن الانتخابات بس مفهمتش هى ايه ... مفيهومش ولا ممثل من اللى بيطلعوا فى التمثيليات فى التليفزيون بس اغلبهم شكلهم ولاد ناس ... كل شويه .. هششششششش .. صوووووووووووووت ... و الواد أبو شعر ده يزعق ... كل اما آجى اشتغل وللا اعمل حاجه يبرقلى .. لولا الاسطى الكبير هنا كنت عرفت اتصرف مع الواد ده ... بعد شويه بعتوا جابوا فطار .. بياكلوا فول وطعميه زينا أهوه .. نابنى من الحب جانب و نصيبى من الفطار جالى لحد عندى .. و الله ناس محترمه ... فيهم تلاته اربعه بيهزروا معايا .. عيال زى العسل وربنا ... ايه ده ؟؟ .. البت اللى معاهم راحت على شنطتها و طلعت سيجاره وولعتها كده عينى عينك ... عادى كده ؟؟ .. بصيت عليها وشاورت لواحد منهم وضحكت .. قالى آه .. شفت نبويه وهى بتدخن ؟؟ ... طول النهار الجدع ده بيضحكنى عليهم ... شويه كده والبت العسل اللى بتصور دى جت ... ومن أول ما جت وهى نازله تصوير كأنها أول مره تمسك كاميرا ... وبعدين جت صورتنى .. كنت مبسوط قوى وهى بتصورنى ... مش عشان بتصور لألألألألألألألألألأ ... عشان أم ضحكه حلوه دى هى اللى بتصورنى ... أول مره احس ان الناس ولاد الناس دول بيشوفونى وبياخدوا بالهم منى ... الجدع اللى كان بيضحكنى ده نده عليا وقالى تعالى ... رحتله .. قالى سلم عليا ... سلمت عليه حسيت بالورقه فى ايدى ... قالى امسك وحط فى جيبك .... بس أنا متعود أقول للاسطى الكبير الأول لو حد هيديلى حاجه ... رحت للاسطى ووريته الفلوس .. قالى خدها ... اتلفت للجدع ده وحدفتله ضحكه على الماشى ... حسيته اتبسط قوى ... بس هو ميعرفش انى اتبسطت اكتر منه .. برضه مش عشان الفلوس لألألألألألألألأ ... علشان شافنى ... وأكتر مره اتبسطت فيها لما وهما ماشيين ... خمسه منهم جم سلموا عليا وهما ماشيين .. منهم اتنين كانوا فاكرين اسمى ... ومنهم واحد سلم عليا وباسنى وقالى .. انت أحسن وارجل من ناس كتير يا عيد .. اتبسطت قوى فى اليوم ده .. مش عشان اتصورت ولا خدت فلوس .. لألألألألألألألألألألألألألألألألأ .. عشان شافونى .. شافونى ومحدش منهم اتريق على اسمى ولا ودانى ... واتنين منهم افتكروا إن ... إسمى عيد

اقتنعت بوجهة نظرى وللا الزقك على قفاك

كنا تلاته قاعدين نتحاور و نتجادل حول مسألة مين الأول البيضه وللا الفرخه ؟؟ ولأن واحد مننا علماني قال البيضه الأول علشان جون بروكفيلد قال كده و لأن التانى متدين أنكر عليه الكلام ده ، و لأني مش فاهم حاجه كنت بحاول أسكتهم هما الاتنين ، وعلشان الموضوع عقيم و ممل و ملوش داعى أساساً ، قررنا إننا نقوم نروح واتفقنا إننا متنكلمش مع بعض تانى أبداً إلا لو حد مننا اعترف إن هو اللي فتح الموضوع ومن هنا راودتنى تلك الفكرة الشريره ، أنا لازم اتعلم أزاى أقنع الناس بوجهة نظرى دايماً ولو دخلت أى حوار مع حد لازم أثبتله إنى على حق و بفهم فى الكفت ، و على ذلك استعنت بشوية أدوات أقدر من خلالهم إنى ألخص الحوارات اللى ممكن تحصل بينى و بين أى مخلوق يتجرأ على مناقشتى و أطلع منها كسبان ، نزلت اشتركت فى الجيم اللى على الناصيه و اشتريت بروتين مركز ( زى العلف كده ) ، و أخدت دورة تنميه بشريه عند مخبر جارنا فى كيفية إقناع القرد إنه بطه ، و أخيراً مطوه قرن غزال بإيد عاج . وبدأت أتلكك علشان أدخل أى حوار مع أى حد واقنعه بوجهة نظرى ما أنا لازم أطبق كل اللي اتعلمته ده لازم اقنع أي حد بوجهة نظري اللى هى أكيد تختلف كلياً وجزئياً عن وجهة نظره طبعاً ، ونفذت بالظبط اللى قاله عم حسن المخبر : أولاً : عم حسن قالى أعمل اتصال بصرى مع اللى بكلمه يعنى أرشق عينى فى عينه على طول وارفع نص حاجب وهو بيتكلم و أحاول أخلى النظره تبقى نظرة تحدى علشان يبقى مرتبك و مهزوز وحاسس إنه ممكن يتلطش فى أى وقت . ثانياً : تانى حاجه الراجل الطيب ده قالهالى تعبيرات الوجه يعنى أديله وش خشب لو الكلام مش عاجبنى مفيش أى تعبيرات عليه و لا تعبير مريح ولا تعبير مش مريح ، ولو اتضايقت من كلامه أرجع برأسى للوراء وكأنى هلوشه روسيه تفلق دماغه اتنين .............. آه قالى كمان إوعى تبتسم فى وجهه وللا تحسـسه إنك مرتاح فى الكلام معاه . ثالثاً : طريقة كلامى لازم تكون مقنعه يعنى صوتى عالى " خدوهم بالصوت " ، وأحاول دايماً أجيب كلمتين من هنا على كلمتين من هناك و لو مفتكرتش أى كلام أقوله قريت كتاب اللاهـثون وراء أبو كريمه ؟؟؟!! طبعاً هيقولى لأ ، وهاتك يا حكم و مواعظ من الكتاب العبقرى ده . رابعاً : لما ييجى الأفندى اللى بيناقشنى يتكلم أسمعه ازاى يا عم حسن ؟؟ اتعدل عم حسن فى قعدته و شد نفس من سيجارته و نفخه فى وشى و قال : ومين قالك تسمعه أساساً ؟؟ سيبه يتكلم كلمتين و قاطعه ، و شككه فى كلامه دايماً و اتلكك على أى حاجه تفهمها من كلامه و امسك فيها بإيديك وسنانك و ركز عليها وعلشان متنساش حاول تعمل أى حاجه و هو بيتكلم طلع منديلك و نف بصوت ، أو كح بصوت عالى بحيث يسكت أو اعطس فى وشه علشان يخاف يكمل الحوار معاك و ياريت لو تنضف ودانك بصباعك الصغير و هو بيتكلم . خامساً : طيب و محتوى الفكره بقى ؟؟ أوصله ازاى ؟؟ فكرت و اكتشفت إن مش لازم يكون عندى فكره أساساً علشان أوصلها لأننا فى عصر العولمه و لكل فرد أحقية الأختلاف مع أى حد أياً كان ، مش مهم مركزه ولا سنه ولا خبرته ولا تعليمه ، مش مهم إذا كان عالم دين أو عالم ذره ، ومش مهم إنى أكون خبير فى الموضوع اللى بتناقش فيه و لا إنى أدرس جميع جوانبه قبل ما اتكلم ، المهم إنى أسفه وأقلل من رأى اللى قدامى و أتريق عليه بكل ما أوتيت من قوه ، و ياريت لو جت فرصه اتهمه بإنه تبع الحكومه أو عميل لقوى معاديه أى منكش و السلام علشان أغير الموضوع وكده طبعاً أنا الكسبان ومحدش فاهم حاجه خالص . سادساً : وفيه حاجه كمان لازم اثبت كلامى بآيه من القرآن الكريم أو حديث شريف ولو مكنش ممكن يبقى جملتين من الكتاب اللى أنتم عارفينه بتاع أبو كريمه اللي محدش عارف هو بتاع مين ولا بيتكلم عن أيه ؟ ، وكمان بقيت بتابع كام برنامج كده على كام قناه فضائيه و اكتب هما بيقولوا إيه وأسماء الشيوخ ، فاهم بقى أو مش فاهم مش مهم المهم أصبغ الموضوع بصبغه دينيه علشان تبقى حجتى قويه و اللى قدامى يتكسف على دمه و يسكت سابعاً : ميبقاش عندى أى صبر على اللى قدامى و لو حسيت انه بيستهزأ بكلامى أو بيستظرف ، أو اكتشف مدى جهلى بالموضوع أخلى اليوم يعدى عليه سنه ، ما هو زى ما عنده لسان أنا كمان عندى لسان و زى ما هو بيستظرف أنا أظرف و أسخف من عشره زيه ثامناً : ودى بقي النقطه الأهم يعني ركز معايا عشان دي الخلاصه ... صاحبنا مقتنعش بكلامى بعد كل المجهود ده ؟؟؟؟؟؟؟؟؟؟؟؟وهنا يأتى دور الأدوات اللى تعبنا فيها و مدفوع فيها فلوس ، شوية الشغل بتوع الجيم و المطوه أم قرن عاج و أؤكد لكم أنه هيقتنع هيقتنع . وده اللى حصل سعادتك و بعدين مسكونى و جابونى على هنا ...................

تصدق إن أنا غلطان إنى اتكلمت معاك من الأول - إعادة نشر

انت مبتفهمش حاجه أصلاً ولا عندك استعداد تفهم ..... طيب فهمنى يا أبو العريف ... أصلاً الكلام معاك ملوش لزوم و تضييع للوقت ... تصدق إن أنا غلطان إنى اتكلمت معاك من الأول ... طيب يا فالح إبقى شوف مين اللى هيكلمك بعد كده . دى كانت نهاية الحوار بين اتنين من شبابنا اللى بنتمنى يكونوا أحسن مننا و من الجيل اللى سبقنا و الأجيال السابقه كلها ، أما ليه وصل الحوار لنقطه مسدوده كده ؟ .. فده لأسباب كتير هنتكلم عنها هنا فى أول حوار لنا . نتكلم عن فن الحوار ببساطه و تلخيص ، الفن ده: يتلخص فى.... * تحديدى لهدف الحوار بينى و بين اللى بحاوره يعنى المفروض نوصل لإيه فى النهايه ؟...، *و أحدد المستوى الثقافى للشخص أو الأشخاص اللى بتحاور معاهم علشان أحدد مستوى الحوار هيكون ازاى و أصلاً أدخل الحوار ده وللا لأ ، *الحاجه الأهم من تحديد الهدف و المستوى إنى لما أتحاور فى موضوع لازم أكون ملم بيه وفاهمه كويس مش أتدخل و اخبط فى الحلل و خلاص علشان شكلى ميكونش وحش قدام الناس ..، *وكمان وأنا بتكلم مقولش فلان قال أو بابا قال أو عمى شاف لأن كل واحد فى الدنيا بيشوف و يقرا و يسمع بطريقته اتكلم عن طريقتى و خبراتى أنا و من وجهة نظرى انا علشان يبقى ليا شخصيه و لو حبيت أقول إن حد قال استعين بكلام ربنا سبحانه وتعالى و بكلام رسوله صلى الله عليه وسلم بس فى موضعه علشان محدش يضحك عليا ، ولو لقيت اللى بتحاور معاهم بيتكلموا بسرعه ومعندهمش صبر للسمع الأفضل إنى أسكت لغاية ما كلامهم يخلص و أقول وجهة نظرى ولو حسيت إن مفيش استعداد يسمعونى أساساً يبقى مفيش داعى أتكلم حتى لو سمعت كلام و آراء مش عجبانى مش لازم لسانى ياكلنى و اتكلم . الحاجه التانيه و دى الأهم فى حياتنا كلها مش بس فى الحوار و النقاش و هى : الأدب و المقصود هنا بالأدب يعنى أخلاقيات الحوار ، و علشان الحوار يطلع مرن و سلس و يشمل جميع الجوانب لازم يكون " الصوت غير مرتفع يعنى بالبلدى أكتر مزعقش للى بكلمه و دايماً أخلينى فاكر إن اللى بيسمع أكتر بيكسب أكتر فى الحوار لأنه بيسمع وجهات نظر اللى قدامه و ممكن يتعلم منهم حاجات كتير ، و كمان يستحسن إنى مقاطعش حد و اسمعه للآخر دايماً علشان أفهم هو عايز يقول إيه و يمكن أعرف منه معلومه جديده عليا " . أما لما أكون بتكلم مع حد كبير : لازم أحافظ على الألقاب يعنى دايماً أقول حضرتك علشان يفضل حاسس بإحترامى له حتى لو أنا مختلف معاه فى الرأى و يفضل هو كمان يحترمنى ،.... ولو أنا مش بحترمه أصلاً يبقى العيب فيا مش فيه يعنى متحاورش معاه لأنى كرهى له هيبان فى كلامى و ممكن جدا أسمع ما لا يرضينى ، ...ولما أكون بتكلم مع متخصص فى حاجه و أنا بناقشه فيها أحاول دايما استدرجه يدينى أكبر كم ممكن من المعلومات ودايماً أخليه يحس من تعابير وجهى إن دى معلومه جديده علشان يقولى كمان و استفيد من الحوار و النقاش لأقصى درجه ممكنه ، و أحافظ دايماً على ألفاظى و أنا بتكلم علشان محدش ينفر منى أو يخبطنى بحاجه على دماغى أهم نقطه بلاش أنفعل خالص و لا أسخن و لا أتمسك برأيى زياده عن اللزوم لأن ممكن فى النهايه كلنا نخرج مستفيدين بمعلومات جديده و آراء جديده و خبرات جديده و برضه كل منا يفضل على رأيه ، وده اللى غالباً بيحصل فى بلدنا كل واحد بيفهم و محدش غيره بيفهم و كل من قراله كتابين وجرنال بقى أبو العريف و محدش قده . بعد اللى كتبته و قلته ده مش عايز حد يرد عليا أحسنله لأنى مبحبش حد يناقشنى أو يحاورنى ... فاهمين ؟؟؟

أرجوك بلاش تستحمى كل يوم

اطلعت على بحثين علميين قام بهما مجموعه من الأطباء و العلماء المعفننين فى كل من انجلترا و الولايات المتحده و العياذ بالله ، اهتم البحثين بأضرار الاستحمام اليومى : • البحث الأول قال ان اللى بيستحمى كل يوم بيشم منجنيز من المياه والمنجنيز ده بيروح على المخموخ على طول ده لو عندك مخ أساساً ، ويجيلك شلل رعاش بقى وشوية بلازى زرقا كده . • البحث التانى كان أكثر موضوعيه لأنه شمل النضافه كلها مش الاستحمام بس ، فالحمار أقصد ذكر الجاموس اللى عمل البحث توصل بفضل جيافته إلى أن النضافه تؤدى إلى الإصابه بالأمراض – والله العظيم قال كده – علشان قال إييييييييييييييييه البنى آدم النضيف ده مش بيتعرض للإصابه بالأمراض والميكروبات إصابه حميده على حد تعبير البهيمه اللى عمل البحث ، فجسم الإنسان النضيف مش بيقدر يقاوم الأمراض و الفيروسات لو هاجمته علشان مش واخد على كده ، المصيبه الكبيره ان البهلوان ده قال إن الاهتمام بنضافة الأطفال غلط ، علشان مش هيجيلهم أمراض بسيطه وده غلط خصوصاً لو كبروا وبقوا جايفين زيه كده ومنضفوش نفسهم كل يوم مش هيقدروا يقاوموا الميكروبات اللى هيربوها فى جسمهم و تحت باطهم ، المصيبه الأكبر ان صديقنا المقرف اللى حاسس إن شامم ريحة عرقه دلوقتى توصل إلى أن المبالغه فى النضافه و الاعتناء بالأكل قد يؤدى إلى الإصابه بالسرطان . وهنا .... أفقت من غفلتى وقررت دراسة الأمر على نطاق الخبراء وقمت بعمل تحليل دقيق ومحاوله لحصر أضرار الاستحمام اليومى و النضافه ومخاطرهم على الحياة الاجتماعيه للإنسان وها هى ذى أمامكم عسى أن تتعظوا : - حسب إفادة الأخت ( ع ) ودى خبيره إداريه وفاهمه ، فإن الاستحمام اليومى بيوقع الشعر علشان الزيوت اللى فيه بتفقد ولا تعوض بسبب غسيل الشعر كل يوم . ( ضرر صحى ) - أما الأخت ( د ) العبقريه فأضافت أن محاولة تعويض هذه الزيوت تتكلف الكثير بسبب ارتفاع أسعار منتجات العناية بالشعر وأوصت ببانتين بروفيت. ( ضرر اقتصادى ) - الأخ ( م ) وده أخويا وبثق فى كلامه أضاف بأن من أهم مخاطر الاستحمام اليومى هو أن نسبة الحوادث المنزلية فى ارتفاع مضطرد و غالباً ما تحدث هذه الحوادث فى المطبخ والحمام ، و أن فى كل مره هتدخل تستحمى ستزيد من مخاطر زحلقتك فى البانيو وانقلابك شر منقلب ، كما حدث معه رغم أنه لم يكن فى البانيو لحظة وقوعه . ( ضرر صحى ) - الأخ ( ع ) وده عينه دقيقه وعنده دقة ملاحظه ، أفاد بأن الاستحمام اليومى يرفع من احتمالات الإصابة بالبرد و الانفلوانزا لأنك هتخرج تقابل تيار هوا خصوصاً لو خرجت حافى و كل خد عليه خوخه. ( ضرر صحى ). - الأخ ( أ ) وده بقى بتاع كواليتى ، فقال إن فيه ضرر كمان وهو ضرر استهلاكى لأن اللى بيستحمى هيهتم بالكواليتى بتاع الاستحمام فهيشترى صابون غالى و شاور غالى وشامبو غالى وفيه كمان استهلاك لليفه وتكاليف مياه وكهرباء أيضاً . ( ضرر اقتصادى ) - الأخ ( ح ) وده بتاع صيانه وفاهم قال إن فيه كمان مصروفات غسيل الملابس اللى هتترمى تتغسل بعد كل حومايه من مسحوق ومنعم قماش ومياه وكهرباء و الأهم صيانة الغساله . ( ضرر اقتصادى) - الأخ ( أ ) وده بقى معلم استراتيجى قال إن كل الحاجات دى ليها حلول لكن إن واحد يكون رمه ويستحمى وينضف العين هتتنقل عليه وممكن الناس تحسده ويولع بجاز . ( ضرر اجتماعى ) - أنا كمان لما عصرت الجمجمه لاحظت إن ممكن واحده تخطفه من مراته لو كان متجوز علشان البيه بقى نضيف وريحته بقت كويسه مش كأنه طالع من البلاعه . ( ضرر اجتماعى ) وأخيراً وبعد سرد كل هذه المخاطر الرهيبة والمفزعة و المخيفه ، عليك عزيزى أن تختار مصيرك ، إما أن تكون نظيفاً وزى الفل وبتلمع كده وريحتك حلوه وتعدى من جنب الناس يقولوا البنى آدم ده نضيف وريحته حلوه ( خيار مثلاً ) مخاطراً بالتعرض لكل هذه المخاطر الصحية و الاجتماعية و الاقتصاديه . وإما أن تتحول إلى إنسان ريحتك مش حلوه ومش نضيف وتربى شوية ميكروبات وتمشى بيهم كده علشان تعرف تقاوم الأمراض على رأى المعفن صاحب البحث الانجليزى . عليك أن تختار بين رائحة شرابك المقيحه و بين احتمال استنشاق المنجنيز ( هععععععععععع ) . عليك أن تختار بين احترام الناس لخصوصيتك ويقفوا قدامك يكلموك على بعد 3 متر وبين أن يقترب منك الناس دون خوف على أنفهم من رائحتك . عليك أن تختار بين أن يسلم عليك أحدهم وهو متضرر ويذهب من فوره إلى أقرب صنبور ويغسل يديه ، وبين أن يسلم عليك ثم يقرب يده من أنفه ليشتم رائحة عطرك ويسألك عن نوعه . عليك أن تختار بين أن يتمنى الناس أن تكون صديقهم أو أخاهم أو قريباً منهم وبين أن يكون كل ما يتمناه لك المحيطين بك هو .................................... أن تستحم . ياللا بقى سلام علشان هستحمى ورايح الشغل .

Talk Show

قبل دقائق من الموعد اليومى لبرنامج التوك شو الشهير " الساعه 60 دقيقه بالليل فى القاهره " و الذى يبث على قناة الحلم الدائرى اليوم ، قمت بإعداد كوب من النسكافيه ( إعلان ) و أحضرت منفضتى و علبة سجائرى من نوع L&M silver label ( إعلان تانى ) ، و جلست على كنبتى المفضله ( إنتاج ورشة الأمانه لصاحبها عم محمد النجار – ش الأسواق بالمنصوره ) ، وأصبحت مستعداً لمتابعة هذا البرنامج الذى يقوم باللت و العجن فى أفضل صوره و يناقش بمنتهى السطحية و الموضوعية كل ما يتعلق بحياتنا اليومية بل و يتطرق أيضاً للقضايا العالميه و العلاقات الدولية و يستضيف مجموعه من كبار الخبراء و كل من هب ودب ليدلى بدلوه سواء أكان الدلو فارغاً أم ممتلئ ، و يصولون ويجولون كجلمود صخرٍ حطه الفقر عند على . بدأ البرنامج بفاصل إعلانى كالعاده يظهر فيه ذلك الشاب محطم قلوب العذارى و اللى مش عذارى يعلن عن مملكه من الجمال فى الحمامات ، ثم ظهر الشاب الرياضى اللى دماغه مفيهاش قشره و يعلم الله أننى كنت أقدره كموهوب و إدارى جيد قبل أن يعلن للجميع أن شعر رأسه خالى من القشره وكأنه يعايرنى ( عقده نفسيه من القشره ) . معانا النهارده موضوعات فى منتهى الخطوره و أخبار تودى فى ستين داهيه و بإذن واحد أحد هنشلكم وانتم قاعدين ، ومعانا مجموعه من الضيوف يجننوا وفاهمين فى كل حاجه و هنتكلم عن دعم رغيف العيش البلدى و علاقته بتخصيب اليورانيوم المنضب و تزغيط الكتاكيت الغجر اللى عباره عن عضم من غير لحم – هكذا افتتح المحاور المتألق صاحب الصوت الجهورى الخفيض النقى المتحشرج برنامجه اليومى – و الآن مع فاصل إعلانى نبدأ بعده بتقرير مصور أعده مراسلنا حبظلم . لا داعى لشرح ما حدث أثناء الفاصل الإعلانى نظراً لوجود ألفاظ لا تليق بالنشر خرجت من فمى تعليقاً منى على الأشقر صاحب إعلانات الحمام ، و بالمناسبه أنصح الناس اللى بتحلق تجرب معجون حلاقة شيف كود الجديد اللى من غير رغوه فبرغم سعره الرخيص إلا أن العبوه شكلها حلو و فعلاً مش بيعمل حساسيه و بتبقى شايف شعر دقنك وانت بتحلقه ( إعلان ) . عدنا ... فى مسل هزا اليوم سنة ألفٍ و ثمانمائه و أربعتٌ و خمسون هزم الجيش الروسىَ فى معركة جاتانا ، وبهزه المناسبة أقام المركز السقافى الروسى ندوةً سقافيةً حاضر فيها الخبير فى العلاقات الدوليه تناول فيها سندوتشين من الفراخ المشويه من مطعم ...... ( رفض ذكر اسمه ) و علبة بيبسى كنز ( إعلان ) ، هزا وقد انتهت الندوة بأن قام أحد الحاضرين بقزف الرجل بفردة الحزاء ، حبظلم أبو شفه من المركز السقافى الروسى . انتقلت الكاميرا إلى الاستديو ، معانا على التليفون الخبير الأمنى عم حسين المخبر لنسأله عن هذا الموضوع : - عم حسين مساء الخير - مساء الخير يا اسطى - فى البدايه نسألك عن رأيك فى هذا الموضوع و ما هى تداعياته الأمنيه علينا هنا فى بلدنا - خلينى فى البدايه أوضحلك نقطه مهمه إنى أساساً مش متابع البرنامج لأنى بتفرج على الماتش على القهوه اللى تحت البيت مع اصحابى ، و أود أن أشيد بالمدرب حسام البدرى و جرأته فى اختيار التشكيل المناسب للمباراه وعندك إيران مثلاً محدش قادرعليها و بتخصب اليورانيوم . - عم حسين الناس يهمها تعرف .... كام كام ؟؟ - و الله لسه تعادل بدون أهداف بس أتوقع نشوف أهداف فى الشوط التانى بإذن الله - الخبير الأمنى عم حسين شكراً لك على هذا الإيضاح دلوقتى معانا هنا فى الاستوديو الاستاذ / سلامه السليم أحد أعضاء مجلس النواب و السيد / عيسوى المعترض أحد أعضاء حركة مش هينفع كده و الصحفى الشهير / جميل صابونه صاحب كتاب " طنطا ليست خالتى و لكنها ينت عمتى " و الذى أثار الرأى العام ، و النقاش هيكون حامى جداً زى قرن الفلفل اللى أكلته الصبح علشان الإمساك يروح ، تابعونا بعد الفاصل و اوعوا تغيروا المحطه و اللى هيغير المحطه يارب يجيله شلل . طبق الأصل العلقه اللى فاتت ، لكن أنصح هنا باستخدام غسول الفم ( ليستر مكس ) للقضاء على الروايح الكريهه الصادره من بقكم لو طفحتوا بصل أخضر مثلاً ، و برضه بينفع مع الجير و البلاك للناس المعفنين المدخنين اللى زيى و اللى بيطفحوا قهوه و نسكافيه كتير ( إعلان ) و بمناسبة القهوه بن عبد المعبود وسط مخصوص هو الأفضل فى مصر حالياً ( إعلان ) بس لو لك حد فى الخليج خليه يجيبلك بن وسط محوج العميد ( إعلان ) . عدنا .... أولاً أرحب بالساده الضيوف اللى قارفينا هنا فى الاستوديو وعلى فكره طوال الفاصل الإعلانى كانوا بيسبوا لبعض دين ومله هما التلاته : - أبدأ بأستاذ سلامه علشان هو عضو الحزب الكبير و ممكن يودينا فى داهيه ، أستاذ سلامه يا ترى يا هل ترى تقدر تقولنا رأيك فيما هو مثار حالياً على الساحه السياسيه و الكرويه عن رغيف العيش البلدى ؟؟ - فى الحئيئه ، لو قلنا إن العيش البلدى يباع بشلم فى الفرن بتاع الدعم ، هنقول انه بيتباع بشلم و ده علشان هو مدعوم ، وزى ما احنا عارفين العيش الأول بيبقى قمح و بعدين بيطحن يبقى دقيق و بعدين يتعجن يبقى عجين و يتساب يخمر شويه و يعلى و بعدين يتحط فى الفرن يبقى عيش و ده اللى الحكومه بتفكر تعمله فى المواطن المصرى . - إزاى يعنى ؟؟ - يعنى الحكومه بتفكر تجيب المواطن و تطحنه و بعدين تعجنه و تسيبه يخمر و يعلى شويه بس معتقدش ان هتحطه فى الفرن . - و الكلام ده هيتنفذ إمتى و للا مجرد وعود وخلاص ؟؟ - لأ مش وعود وخلاص ، احنا فى المرحله الأولى دلوقتى و آثارها هتبان قبل نهاية الخطه الخمسيه اللى اتلغت أساساً . كلام جميل من السيد / سلامه ، و نخش بقى على السيد / عيسوى المعترض و اللى شايفه كان بيكتب حاجات علشان يعرف يرد على سلامه : - استاذ / عيسوى ، انت سمعت كلام سلامه ده ايه رأيك فى اللى اتقال ؟؟ - أنا شايف ان الكلام اللى اتقال غير موضوعى بدليل ان الحجاب الحاجز ... قصدى السور الحاجز ... البتاع الفاصل ده اللى بيعملوه بيأثر على المياه الجوفيه غير المستغله فى الصحرا الغربيه ، وممكن نزرع مواطنين هناك ، قصدى نزرع قمح ونوطن مواطنين فى الصحرا الغربيه علشان نعمل محطة طاقه نوويه و نخصب اليورانيوم المنضب و ممكن نعمل صواريخ نوويه استراتيجيه فى الحاله دى ونركبها و نطلع بيها القمر ، الناس طلعت القمر من زمان و احنا هنا لسه بنتكلم عن الزباله اللى فى الشوارع ، ينفع كده ؟؟؟ ... وبعدين الكتب غاليه جداً ، ومحدش بيقرا جرايد علشان الجرايد بتكدب و البرعى هيترشح لرياسة الجمهوريه ، و كان فيه كمان بودرة سيراميك فى اللبن و كده يعنى . - نورتنا يا استاذ عيسوى بس إيه رأيك الحل ايه فى القصه دى ؟؟ - خلينى أقولها بكل صراحه و وضوح و أعلنها من هذا المنبر ، كل واحد يروح الماتش و لازم نملاً استاد القاهره عن آخره و نشجع تشجيع حضارى علشان نساند المنتخب . أعتقد ان استاذ عيسوى كان واضح فى كلامه ورسالته فاصل ونعود مع أستاذ / صابونه يزحلقللنا أفكاره و يغسل وداننا من القرف اللى سمعناه من الاتنين التعبانين دول . نفس الولد الـ.......... ابن الـ.......... كينجدوم أوف بيوتى ، و التانى أبو من غير قشر فى شعره ( يارب شعرك يقع يا حازم ) ، على فكره معجون أسنان سنسوداين للأسنان الحساسه كويس جداً لو أسنانك تعباك ( إعلان ) . عدنا .... - استاذ / جميل ، ياريت تزحلقنا بأفكارك النيره - أناااااااااااااا .... أناااااااااااااااااااا - انت ايه ؟؟ - أنا بصراحه و مع احترامى للاتنين الاوساخ دول عندى رأى رابع بصراحه . - وايه هو رأيك الرابع ؟؟ - أنا هعمل مقارنه بسيطه جداً بين الوضع دلوقتى و الوضع أيام زمان .... الوضع دلوقتى مختلف عن أيام زمان ... يعنى مثلاً عندك الاتوبيس كان بيروح من شبرا لغاية التحرير فى عشر دقايق ... دلوقتى فى نص ساعه .... ده ليه ؟؟؟ ... لو جينا نحلل الأسباب هتلاقى ان أقباط المهجر معترضين على التفرقه بينهم و بين المسيحيين فى مصر ، و ده نابع من شوية حاجات ، الحاجه الأولانيه ان سواقين التاكسيات مينفعش يشغلوا العدادات علشان هى عطلانه أساساً ، و الحاجه التانيه ان المحلات اللى فى وسط البلد بتبيع الحاجه أغلى من تمنها علشان الإيجارت عندهم غاليه دلوقتى ، و الحاجه الرابعه ان حسن شحاته مخدش ميدو فى المنتخب. - معلش يا أستاذ جميل ، حضرتك عندك مشكله مع رقم 3 ؟؟؟ - ليه بتقول كده ؟؟ - علشان رأيك رابع وانتم تلاته ، و وانت بتعد الاسباب قلت الاولانيه و التانيه و مقلتش التالته و نطيت على الرابعه على طول . - آآآآآآآآآآآآآآآآآآآآه ..... هو حضرتك مقريتش كتابى الشهير لا لرقم 3 ؟؟؟ - لأ فى الحقيقه مقريتوش فيه ايه الكتاب ده ؟؟؟ - أنا أثبت ان رقم 3 ده رقم غلط و مش موجود أصلاً و ان الكتابات الفرعونيه كلها مفيهاش رقم 3 وبكده دحضت كل الادعاءات الصهيونيه بوجود الهيكل تحت المسجد الاقصى . - مش فاهم ايه العلاقه بين رقم 3 و المسجد الاقصى بصراحه . - الحقيقه ولا أنا بس ده موضوع كتابى الجاى هيبقى من نشر دار الطباعه الجديده شارع أبو الفدا بالزمالك . نطلع فاصل اعلانى قبل ما يغمى عليا . فاصل اعلانى ... نفس العيلين اللى قربت اكرههم ... أنصح اللى عنده قشره يحك فروة راسه بشوية خل تركيز 6% قبل ما ياخد دش يومياً 5 مرات ، هيحصل شوية التهابات فى فروة راسك تستخدم مرهم بانثينول ( إعلان ). عدنا .... معانا على الهاتف مداخله تليفونيه من السيد اللواء الدكتور المهندس طيار مقاتل / شبانه البرنس ، رئيس جمعية قدامى المحافظين علشان له تعليق على الكلام الغبى اللى اتقال دلوقتى : - سيادة الاراجوز أهلاً وسهلاً ، قول تعليقك على طول علشان وقت البرنامج و مش فاضين لسعادتك . - أولاً مساء الخره عليك و على ضيوفك وعلى الساده المشاهدين ، و أنا باعتبارى محافظ سابق تم إقالته نتيجةً لمخالفات ماليه جسيمه ، أحب أقول للناس و أوضحلهم الحقايق ... محدش فى مزارع الفراخ قال ان الكتاكيت الغجر ممكن تتزغط ، و النظام المتبع حالياً فى إنشاء المزارع السمكيه هو نظام مش كويس و فاشل و أيام لما أنا كنت محافظ كان النظام زى الفل لأن زى ما انتم عارفين أنا كنت محافظ للوادى الجديد و كل لما حد كان بيعمل مزرعة سمك كان الرمل بيشرب الميه من المزرعه و تفشل تماماً و علشان كده منعت المزارع السمكيه فى الوادى الجديد ، و أطالب من هذا المنبر كل الناس فى مصر انها كل يوم الصبح تغسل وشها و إيديها بالميه والصابون و ياريت لو فيه ديتول أو أى مطهر لأنى لاحظت فى الفتره اللى فاتت ان فيه ناس كتير ماشيه معمصه فى الشارع و فيه برابير على شنبهم. - ربنا يقرفك يا سيادة اللوا ، مع السلامه - ياللا فى ستين داهيه . وصلنا دلوقتى لنهاية برنامجنا و الحمد لله .... غمه و انزاحت ، بالسلامه ونشوفكم بكره فى نفس الميعاد . هذا البرنامج برعاية .................... طلع ابن الجزمه تانى بتاع سيراميكا كليوباترا ..