كتيره الناس اللى اتكلمت عن الوطن و أكتر منهم اللى اتكلموا عن الغربه ، لكن حسيت و بحس إن محدش منهم ربط الاتنين ببعض ربط تام كل اللى بيتكلم عن الوطن بيتكلم من وجهة نظره لمفهوم الوطن ، مش من وجهة نظر الوطن نفسه ، و كذلك اللى بيتكلم عن الغربه بيحكى معاناته ومعاناة الآخرين مع الغربه ، و اللى هتكلم فيه و عنه هو معاناة الوطن معانا و معاناة الغربه أيضاً .
الوطن
حد فينا سأل نفسه قبل كده يعنى إيه وطن و يعنى إيه احتياجات الوطن من المواطن ؟؟
للأسف محصلش وده لسببين أولهما : إن كلنا بنسأل احنا محتاجين إيه من الوطن علشان نحس انه وطن و نحس بالانتماء له .
و ثانيهما : اننا بنكره كلمة مواطن دى من أساساها ومش بنحب نسمعها و لا نقراها لأسباب كلنا عارفينها طبعاً.
الوطن بيقولك : يا مواطن أنا محتاجك
بجد محتاجك
محتاج كل مجهودك وطاقتك فى الإفاده و الاستفاده ، محتاج كل خبراتك و ذكائك ( ده لو عندك طبعاً )
محتاجك صاحى و واعى مش مدمن ومتخدر بحجج فارغه
محتاجك مخلص و شريف مش مرتشى و متهرب من الضرايب و الجمارك
محتاجك متدين و صريح مش حلنجى و صايع و زانى و بتاع نسوان
محتاجك متعلم ومثقف مش خريج و بصمجى مبتعرفش عربى أساساً
محتاجك تبنى وتعمر و تتعب و يتهد حيلك و تجوع و تتشرد علشان تلاقى فى آخر طريقك نور وخير و عدل
محتاجك شخص قوى له صوت يعنى حد له شخصيه مش مجرد جعجاع معارض أو موالس معفن
محتاجك معطاء مش مخرب بتقطع فى فرش الاتوبيس و تكتب اسمك للذكرى الهباب على دماغ أمك
محتاجك حد نضيف مبتسم ومستحمى يا معفن محتاجك تفتح نفس أخوك على الحياه مش تقرفه من شكل و ريحة أهلك
محتاجك طيب و محترم بتعامل اخواتك كويس و تعطف على الفقير الغلبان و اليتيم المسكين مش تاكل حقهم
الوطن بيقولك يا تبقى زى ما هو محتاجك ، يا تفارقنا و تغور بنجاستك و قرفك و صياعتك وإدمانك تشوفلك غربه تترمى فى أحضانها يمكن تعلمك النضافه أو تزيد فى جيافتك و قذارتك وكفايه عليً القذاره اللى عندى مش ناقصك .
حد عرف يعنى ايه وطن دلوقتى ؟؟؟؟؟؟
معتقدش
طيب بالراحه علينا شويه... اكيد في ناس عايزه تخدم الوطن، وناس ماتستاهلش يكون ليها وطن اصلا..
ردحذفلكن في ناس في النص، عايزه تاخد وتدي، عايزه تساعد ولما تقع تلاقي حد يساعدها، عايزه تحس انها جوه حضن اللي بسموه حضن الوطن..